Austria khawpui Vienna-ah silai kengten an ram huna Thawhṭanni zan khan cafe, bar leh restaurant-a awmte beiin an pawng kah a, mi panga an thih bakah mi dang 15 in hliam an tuar.
He thil thlen hun hi zan lama Covid-19 vanga lockdown puan hma chiah a ni.
Austria top security official-te chuan pawikhawihtu zinga rinhlelh pakhat chu police-te chuan an kap hlum ve nghal tih an tarlang.
Austrian Chancellor Sebastian Kurz chuan Thawhṭanni zana thil thleng hi firfiakte chetna a ni tih sawiin, pawikhawihtu zinga pakhat chu kahhlum ni mah se, mi dang pasarih chu an tlanchhe hman niin a sawi a, chhui zui nghal an ni, a ti.
Pawikhawihtute hian an thil tih tur hi a hma aṭanga an lo ruahman lawk vek nia a lan thu leh, ralthuam pawh an neih ṭhat thu a sawi. Interior minister Karl Nehmmer pawhin police-ten an kahhlum chu Islam firfiak a ni, a ti.
Kurz chuan pawikhawihtu pakhat an kahhlum nghal vangin police-te a fak a, firfiakte pawikhawihna thlen hi an inhnehtir dawn lo a, an theih angin an bei let zel dawn tih a sawi a ni.
Police-te chuan nimin khan pawikhawihna thleng vang hian mipuite chu in lama tawmin turin an ngen a, naupangte pawh school kal rih lo turin an ti bawk.
Vienna khawpui laili laia pawikhawihna thleng hi ram hrang hrang hruaitute chuan an dem thu an sawi a, an zingah hian France president Emmanuel Macron leh US president Donald Trump te pawh an tel.
