IS-in Kabul University beitu an nih tih sawi

Islamic State (IS) firfiak pawl chuan Thawhṭannia Afghanistan khawpuia Kabul University beitu an nih thu an sawi. 

Kabul University beihnaah hian mi 22 an thi a, a tam zawk hi zirlai an ni. Mi dang 80 in hliam an tuar. Hliam tuar zingah hian judge, investigator leh security mi leh sate an tel. 

Thawhṭanni chhun khan university campus chhungah thihchilh bomb tihpuah a ni a, hmei  hnu hian mi pahnih chuan silaiin zirlaite chu an pawng kah zui a ni. 

Ministry of higher education Hamid Obaidi chuan campus-ah hian Iranian book fair neih tum a ni a, a hawnna inkhawma tel tura sorkar official-te thlen lai velin he pawikhawihna hi a thleng niin a sawi. 

Taliban chuan university beitu hi an nih loh thu an sawi nghal a, nimin khan IS firfiak pawl chuan an tih a nih thu an puang ta a ni. Afghanistan-ah hian IS leh firfiak dangte zirna in an bei fo a, kar liam ta pawh khan Kabul khawtlang lama educational centre chu IS-ten thihchilh bomb hmanga beiin mi 24 an thi a ni. Kum 2018 khan Kabul University-ah thihchilh bomb tihpuah a lo ni tawh bawk a, zirlai eng emaw zat an thi. He pawikhawihna hi IS chuan an tih niin an lo sawi tawh bawk. 

Afghanistan sorkar chuan nimin kha Kabul Univeristy beihnaa thite sunna ni atan a p uang a, ram pumah leh ram pawn lamah an embassy-ah an hnam puanzar a ngul chanveah zar a ni. President Ashraf Ghani chuan firfiakte pawikhawihna thlen chu a dem thu sawiin, phuba an la ngei dawn tih a sawi a ni.