Cambodia-a kum 1975-1979 inkara rawng taka roreltu, Pol Pot kaihhruai Khmer Rouge rorelna hnuaia chief interrogator ni ṭhin, Kaing Guek Eav chu nimin zing khan kum 77 mi niin Phnom Penh-a damdawi-inah a thi.
Comrade Duch tia hriat lar, Kaing Guek Eav hi kum 1942-ah a piang a, mathematics zirtirtu ni ṭhinin a hnuah Khmer Rouge hi a zawm a ni.
Duch hi Khmer Rouge hunlaia Phnom Penh-a Tuol Sleng school ni ṭhin, S-21 tanin atana an hman taka an mi man mi sang telte nghaisaknaah a hotu ber a ni. He tanin hi mi tangte nghaisakna nasatna ber hmun nia sawi a ni ṭhin. He hmun aṭang hian mi 15,000 vel chu tihhlum an nihna hmun, 'Killing Fields' tia sawiah an thawn nia sawi a ni.
Khmer Rouge rorelna hnuaiah hian mi maktaduai hnih vel tihhlum an nia sawi a ni. An rorelna paihthlak a nih hnua Khmer Rouge hruaitu zingah Cambodia-a war crimes tribunal-in hremna a pek hmasa ber a ni.
Kum 2010 khan thiam loh chan tirin, kum 2012-ah dam chhung tang tura hrem a ni.
A thubuai ngaihtuah a nih lai hian Duch chuan S-21 in-charge tana dah a nih thu leh, he hmuna pawikhawihna rapthlak taka a inhnamhnawihnaah ngaihdam a dil. Thupek a zawm avang chauha hetianga che a nih thu a sawi a, mahse a ngaihdam dilna hi tribunal chuan a hnawlsak. Kandal taninah dam chhung tang turin a chungthu a relsak ta zawk a ni.
Hun eng emaw chen chu chuap lam ṭha lo a neih avangin damdawi-inah pawh a lut fo a, Thawhṭanni khan lut lehin, ṭhat lam a pan thei lo a, nimin zing khan Khmer Soviet Friendship Hospital-ah a thi ta tih tribunal thupuangtu, Neth Pheaktra chuan a sawi.
