Pakistan court-in Sept 10 hmaa inpe turin PM hlui Sharif hriattir

Pakistan court chuan an ram prime minister hlui, Nawaz Sharif chu eiruk thubuai a neih mekah September 10 hmaa thuneitute kuta inpe a, court-a inlan turin a hriattir leh. Hei hi a 'last chance' a nih thu a sawi bawk.

Kum 70 mi, Sharif hi nikum November-a Lahore High Court-in damdawi lama inenkawl tura thli li chhung ram pawna zin chhuah a phalsak hnuah London a pan a, tun thlengin a la awm. 

PM hlui hi  Al-Azizia Steel Mills case-ah kum sarih tang tura hrem a ni. 

Thawhlehni khan Islamabad High Court special bench chuan Avenfield leh Al-Azizia Steel Mills case-a Sharif, a fanu Maryam Nawaz leh a makpa Captain (retd) Safdar-te thiam loh chantir an nih chungchang ngaihtuah ṭha leh tura ngenna thehluh chu a ngaihtuah a ni. 

Pakistan sorkar chuan Sharif chu thiam loh chang tlanchhiaah a puang tawh a, UK sorkar pawh an rama thawn kir a nih theihna turin a be tawh a ni. Sharif-a hnena thla li chhung medical ground-a bail pek chu nikum December thla khan a zo tawh niin a sawi bawk. 

Hetih lai hian Sharif-a lawyer, Khawaja Harris chuan PM hlui hi Pakistan rama kir turin a taksa a la chak ṭha lo hle niin a sawi thung.