US-in an ram state-te hnenah RAT ṭhahnem tak sem dawn

US sorkar chuan kar liam ta khan Abbott Laboratories hnen aṭangin Covid-19 test-na khawl, rapid antigen test (RAT) chu a lei a, hei hi US-a state leh territory-te hman tura tih a ni.

RAT an lei chungchangah hian US Department of Health and Human Services-a assistant secretary, Admiral Brett Giroir chuan day care center, first responder leh critical infrastructure an lei tel thu a sawi a, September thla laihawl hian an leina Abbott nen ṭangkhawpin state leh territory-ahte RAT hi sem ṭan tum a nih thu a sawi bawk.

President Donald Trump chuan kar hmasa lam tawh khan Abbott Laboratories nen an thawh dunna tur US dollar maktaduai 750 hu inremna an siam thu a sawi a, he inremna hmang hian rapid antigen test mtd 150 hi lei a ni ta a ni. RAT hi US-a Food and Drug Administration chuan kar liam ta Nilaini khan emergency atana hman turin a pawm thu a lo tarlang tawh bawk. Hun rei lote chhunga hri an kai nge kai loh tih hriat chhuah vat theihna tur niin, miunte 15 chhungin a result hi hriat hman beisei a ni. 

RAT hmanga test man hi US dollar 5 a ni a, he test-naah hi chuan lab equipment hman a ngai tawh dawn lo a ni. Hei vang hian US-a mi tam zawk chu hri an kai nge kai lo tih hriat chhuah zung zung a ni thei tawh dawn a, hri ven dan kawngah pawh nasa takin a pui thei dawn tih Department of Health and Human Services-a secretary, Alex Azar chuan a sawi.

US-ah hian hri kai nia rinhlelh leh hri kai test tawh zat zawng zawng hi maktaduai 85 chuang a ni tawh a, hri kai zat hi nimin thleng kha chuan mi 62,57,938 an awm tawh. US hi hri kai tamna ber ram a la nih bakah thihpui tamna ber ram a la ni mek.