Sir Lanka President Maithri-pala Sirisena chuan Pathianni khan special gazette notification tichhuakin, an ram chhung politics buaina a zual zel vangin karleh Nilaini, November 14-ah Parliament inkhawm a ko.

President office chuan Parlia-ment inkhawm hi Nilaini zing dar 10 aṭanga neih ṭan tur a nih thu a chhuah.

President hian October 26 khan Prime Minister aṭangin Ranil Wickremesinghe a ban a, a aiah President hlui Mahinda Rajapakse a ruat nghal a, hemi hnu hian November 16 thleng atan Parliament pawh a titawp zui bawk.

PM aṭanga a ban, Wickreme-singhe-a party United National Party chuan ban a nih dan chu danloa thiltih leh, ram danpui kalh a nih thu an sawi. Wickremesinghe hian Parliament-ah majority a la neih avangin Sri Lanka PM a la ni reng niin a sawi bawk. UNP hian Rajapaksa rin tawk lohna motion pawh an thlen tawh niin an sawi a, mahse President chuan an thu thlen hi a ngai pawimawh lo hle niin an sawi. Parliament-ah Wickremesinghe hian thlawptu MP 103 nei mekin, Rajapaksa hian 100 a nei thung.

Sri Lanka-a Tamil party lian, Tamil National Alliance chuan Prime Minister thar Mahinda Rajapsaksa rintawk lohna motion chu an thlawp dawn tih an sawi. Hemi rual hian ramchhung politics buaina tihreh a nih theih nan President Maithripala Sirisena chu Parliament-ah vote thlak remti turin an phut bawk.

Hetihlai hian PM Mahinda Rajapaksa chuan majority a nei tih finfiah turin thlawptu a ngah tawk a, PM aṭanga ban tak Ramil Wickremesinghe thlawptu member parukte pawh a lamah an ṭang tawh tih a sawi. President hian Parliament hi a la titawp lailawk a, hei hi Mahinda Rajapaksa-an a lam ṭang tura midang a thlem luh theihna tura ruahman nia ngaih a ni.

Tamil National Alliance chuan PM atana Rajapaksa ruat a nih dan chu Constitution 19th amendment palzutna a ni tih an sawi a, rin tawk lohna motion pawh an thlawp dawn a ni, an ti. Hetihlai hian TNA MP 16 zinga pali chuan Rajapaksa hi an thlawp nia sawi a ni thung.