Kristian-te beitu firfiak 19 kaphlum

Egypt Interior ministry chuan kar kalta Zirtawpni-a Minya province-a Coptic Kristian-te bei a, mi pasarih kaphlumtute nena inzawmna nei firfiak 19-te chu Pathianni khan police-ten an kaphlum niin a sawi.

Firfiakte hian police-te bei hmasain, police-ten an kap let nghal niin ministry thuchhuah chuan a tarlang. Firfiak 19 kahhlumte chu Egypt ramchhunga pawikhawihna hrang hranga inhnamhnawiha rinhlelh an ni tih a sawi bawk.

Islamic State (IS) firfiak pawl chuan Zirtawpnia Saint Samuel monastery beitu an nih thu an sawi tawh. Pope Francis chuan Egypt-a Coptic Kristiante beih an nih chuan a rilru a ti na hle tih sawiin, Kristian an nih vang chauha thah an ni, a ti. Egypt ram mipui maktaduai 97 vel zingah Kristian hi 10% vel chauh an ni a, IS firfiakte hian an bei fo a ni.