US President Donald Trump-ah intiamkamna engmah awm loa Iran President Hassan Rouhani nena inbiak a inpeih thu a sawi chu Iran chuan a hnawl.
Iran official-te chuan President Trump-an Iran nuclear deal aṭanga a inhnuhdawh hnu leh Iran hrekna tur thar a siam hnua inbe tura rawtna a siam chu awmze nei lo leh inhmusitna anga an ngaih thu an sawi.
Iran foreign ministry thupuangtu, Bahram Qasemi chuan Trump-an inbiak a rawt chu Iran chunga a chet dan nena inkalh tak a ni tih a sawi a, Iran nena sumdawnna lama inkungkaihna siam lo turin ram dangte pawh a lo nawr tawh a ni, a ti. A thu sawi chu inremna kawng zawnga inbiakna neih a duh tak tak nge, lar a khelhna hmanrua mai mai a ni tih a finfiah phawt a ngai a ni, a ti.
Iran Strategic Council on Foreign Relations hotu, Kamal Kharrazi pawihn Trump-a rawtna siam chu awmze nei lo anga a ngaih thu a sawi a, inbiakna neih tawh chungchanga America laka an tawnhriat neih tawh leh, US official-ten an thu lo tiam tawh an palzut chungchanga an tawnhriat aṭangin he rawtna hi hlutna nei lo anga a ngaih thu a sawi.
Interior minister Abdolreza Rahmani Fazli chuan inbiakna neihpui turin Iran chuan US chu a ring tawk tawh lo tih a sawi a, US chu awmze nei loa nuclear deal aṭanga a inhnuhdawh hnuah an ring thei tawh lo tih a sawi.
Iran pawisa hlutna hi a tlahniam nasa hle a,Thawhṭanni khan US dollar khat leh rial 120,000 a inhen laiin, President Trump-an Iran nena inbiakna neih a inpeih thu a sawi hian a rawn sang phah leh a,Thawhlehniah chuan dollar khat leh rial 110,000 a inhen a ni. Iran Vice-President Eshagh Jahangiri chuan US-in a hrekna vang leh an ram pawisa hlutna tlahniam zel vanga sum lama harsatna an tawhte chinfel dan kawng zawgin tun kar tawp hian sorkar leh central bank thawkdun chuan economic plan thar an puang dawn tih a sawi a ni.
