Golden Bridge in tlawhtu ngah
Kumin June thlaa hawn, Vietnam rama Golden Bridge chu a dangdai em avangin tun thlengin tlawhtu an tam hle a, khualzin hiptu lar tak a ni zui a ni. Social media lamah lei thlakak hi a darh nasa tawh hle.
Golden Bride hi Danang bula Ba Na Hill-ah June thla khan hawn a ni. Hei hi concrete hmanga siam, kut lian tak pahnihin a chawi anga lang a ni. He lei design tu leh TA Landscape Architecture neitu, Vu Viet Anh chuan an lei siam chu hetianga taka ngaihven a hlawh an rin phak loh thu a sawi. An design chhan chu he leia kalten pathian kutin a chawi reng anga ngaia rilru an put theihna tur a ni tih sawiin, an thil siam hi an chhuang hle tih a sawi. Lei hi meter 150-a thui a ni. Ba Na Hills project thawktu hi Sun Group a ni a, kum 2016 khan Vietnam rama tlang sang ber Fansipan-ah cable car a lo siam tawh bawk a ni.