South Korea President Park Geun-hye-i bang tura phutin kar kalta Inrinni khan an ram khawpui, Seoul-ah mi tam takin kawng an zawh.
President Park-i hian a thusawi tur chu a ṭhian pakhat a siamṭhat tir tih hriatchhuah a nih hnuah, a senior adviser 10-te a ban a ni. President-in a chhawr hi sorkara nihna pawimawh nei lo, Choi Soon-sil-i a ni a, sorkar policy siam chungchangah inhnamhawihah puh niin, sum lamah pawh hlawkna a tel nia sawi a ni. He thil thleng hi duh loin mipuite chuan President hi bang turin an phut a ni.
Prosecutor-te chuan kar kalta Inrinni khan President thurualpui nia puhte chenna in eng emaw zat an dap a, Choi-i thawhpui nia rinhlelh official te computer leh file eng emaw zat an man.
Seoul-a President Park-i duh lohna kawngzawh buatsaihah hian mi 20,000 vel an tel a, eptute chuan he thil thleng hian Park-i chu president nihna leh, South Korea ram roreltu nih a tlin tawk loh zia a lantir a ni, an ti.
President Park-i hian a thusawi tur a ṭhian pakhat a siamṭhat tir chungchangah hian TV-ah ngaihdam a dil tawh a, Choi-i chu President a nih ṭantirh lama a thusawi turah chauh a inrawlh a ni, a ti.
Report ṭhenkhat chuan Choi-i hi sorkarin inrelbawlnaah a inrawlh nasa hle a, Korea ram pahnihte thawhdunna Koesong industrial complex khar tura SKorea sorkarin thutlukna a siamnaah pawh a inrawlh thuk hle niin an sawi. Minister tur ruat chungchangah te, presidential speech siamṭhatnaah pawh a inrawlh a ni, an ti.
