Khawvel Lawrkhawm
Italy-ah magnitude 6.6-a nain lir a nghing
Central Italy-a Norcia bialah nimin khan magnitude 6.6-a nain lir a nghing a, in tam tak a chhia. Lirnghing hi an ram khawpui, Rome-ah pawh an hria a ni.
US Geological Survey chuan lir nghing inṭanna hi regional centre, Perugia aṭanga chhimchhak lam km 68 vel a ni tih sawiin, Norcia khaw bul lawka lei hnuai km 1.5 chauha thuk aṭangin a ni, a ti.
Nimina lirnghing hi August 24-a lirnghing vanga mi 300 dawn an thih hnua a, a nat leh ber ṭum a ni. Lirnghing-in chhiatna a thlen avanga thi an awm thu report a la awm lo a, mahse in tam tak a chhia a, heng zingah hian hmanlai in hlui eng emaw zat a tel.
UN Human Rights Council-ah Russia tling lo
Member 47 awmna, UN Human Rights Council-ah Russia a tling zo lo.
UN Human Rights Council-ah hian hmun ruak 14 a awm a, hemi hnawhkhat tur hian kar kalta Zirtawpni khan UN General Assembly-a member ram 193-te'n vote an thlak a ni. Member chuhtu zingah hian Russia leh Guatemala chuan vote hmuh ngai zat an hmu pha lo a ni. Russia-in member a chuh hi human rights group 87 chuan an dodal tih deputy UN director for Human Rights Watch, Akshaya Kumar chuan a sawi.
UN Human Rights Council member atana thlan tlinte chu - Iraq, Saudi Arabia, Egypt, China, Brazil, Rwanda, Cuba, South Africa, Japan, Tunisia, U.S, U.K, Hungary leh Croatia-te an ni.
Jerusalem-a Isua thlan hawng
Preservation expert-te chuan kum zahnih dawn chhunga a ṭum khatna atan Jerusalem-a Church of the Holy Sepulchre-a Isua phumna hmun nia sawi chu an hawng.
Thlan chhung hi cheiṭhat leh zirchian turin ni thum chhung hawn a ni a, thlan chhungah hian Isua an zalhna lung nia sawi pawh a awm. Thlan bang hi marble hmanga siam a ni a, kangmei chhuak vanga cheiṭhat tura kum 1810 vela an hawn hnua an hawn lehna hmasa ber niin Father Samuel Aghoyan, Amercian church superior chuan a sawi. Jerusalem Old City-a Isua thlan awmna cheiṭhat hna hi kumin kumtir aṭang khan thawh ṭan a ni a, he hna thawk tur hian Kristian pawl hrang hrangte remtihna an la a ni. A cheiṭhat hna hi kum 2017, March thlaah zawh fel hman beisei a ni.