Scheduled Tribe Demand Committee of Manipur (STDCM) chuan eng hnam pawh tribal nihna pek chu court rorelna hnuaia mi a ni lo, an ti. STDCM chuan tribal huamchhunga hnam belh emaw paih tura thutlukna siam thei chu Parliament chauh an ni tih an sawi.

STDCM chuan thuchhuah siamin, Manipur chhunga hnam ṭhenkhat chuan Meitei-te'n Schedule Tribe-a telh an dilnaah hriat fiah tawk loh an neih thu an sawi. Manipur High Court-in thupek a lo chhuah tawh aṭanga paragraph number 17 (iii) chu hman a nih leh loh nana sutna thupek court-in a chhuah leh chu thuthar thehdarhtute chuan a dik lo zawnga kuai herin, mipui rilru tibuai thei zawnga thu chhuahah an puh bawk. Court thupek sut leh hian Meitei tribal nihna hnawlsak lam a kawk lo tih an tarlang a ni.

Meitei tribal huam chhunga telh an nih ve theih nana court lama hma la turin mi tam takin thurawn an pek ṭhin thu STDCM chuan an sawi a, hemi chungchangah hian dan lama mithiam an râwn thu leh, anni chuan tribal nihna pek an nih theih nan court chuan tihtheih vak an nei lo tiin thurawn an pek thu an sawi. STDCM chuan ṭanchhan atan Supreme Court-in State of Maharashtra vs Milind & Ors., 2001 chungchanga a rorelna hmangin, heta court thutlukna hian Schedule Tribe nihna pek chu court thuneihna a nih lohzia a tichiang hle a ni, an ti.

Meitei-te hnam anga an damkhaw chhuah theih nan tribal nihna pek chu thil pawimawh tak a nih thu STDCM chuan an sawi a, Meitei MLA leh minister zawng zawng pawh an hmalakna thlawp tlat turin an sawm bawk. Hemi bakah hian Manipur state chhunga tribal nihna nei tawhte chu hlauthawng lo turin an chah tel a, an state sorkar chu tribal ni mekte hlauhthawnna chu chinfelsak an nih theih nan hma la turin an ngen bawk.