Sakhuana hmanga min ṭhendarh tumna a awm : Meghalaya opposition leader

Meghalaya opposition leader, Ronnie V Lyngdoh chuan sakhuana hmanga hnam tenau zawkte ṭhenhran tumna a awm mek nia a hriat thu a sawi.

Ronnie V Lyngdoh chuan tun hnaia Assam chief minister, Himanta Biswa Sarma-a'n Kristian missionary-te chungchang a sawi dan chu pawi a tih thu a sawi. Assam CM-in mi ṭhenkhat Kristiana an inleh theih nana hma la ṭhin nia missionary-te a puhna chu sakhaw inhuatna thehdarh theihna a nih bakah, sakhaw zalenna rahbehna chi khat a nih thu a sawi a ni.

Sakhuana hmanga politics a hamṭhatna zawng an awm ṭhin tih Lyndoh chuan sawiin, hei vang hian sakhaw ṭhenkhat vuantute chuan an tawrh phah ṭhin thu a sawi. Hetiang thil thleng hi India rama thleng atan a inhmeh lo hlea a hriat thu a sawi bawk.

Lyngdoh chuan India ram chu sakhaw zalenna ram a nih thu sawiin, rinna hrang hrang vuantute chu inngeih taka an khawsak tlanna hmun a nih thu a sawi a, a sikul luh tawhna, St Anthony’s High School-ah pawh sakhaw hrang hrang betute an luh ve thu leh chutah chuan tihluihna hmanga Kristiana inleh tirna a thlen ngai loh thu a sawi lang bawk a ni.