Sikkim CM-in Self Help Group tihchakna tur a puang

Sikkim chief minister PS Golay chuan Pathiannia SHG Bharosa Sammelan a hmanpuinaah Self Help Group-te'n hmasawnna an neih theih nana hmalakna tur hrang hrang a puang. CM Golay chuan kum tin March 8-ah SHG puala hun hman ṭhin a nih dawn thu a puang bawk a ni.

Chief Minister chuan SHG hmasawnna atan district tinah SHG chairperson post siam a nih dawn thu sawiin, chairperson chu SHG member-te'n an duh zawng an thlang chhuak ṭhin dawn a ni. District paruka SHG-te'n thlai chi an leina turin Rs. vbc. 2 dah hran a nih thu a sawi bawk. Hemi bakah hian SHG Bhawan chu district parukah sak a ni dawn tih a sawi a, SHG mi leh sate veivah nan heng district parukah hian lirthei pahnih ṭheuh pek an nih dawn thu a sawi lang bawk.

PS Golay chuan khawtlang tana SHG-te hnathawh chu chhuanawm a tih thu a sawi a, chumi kawngah chuan hmeichhia, SHG-a inhmangte an thawh hlawk hle nia a hriat thu a sawi bawk. Golay chuan a kaihhruai sorkarin an state chhunga hmeichhia, pasal nei tawhte'n bâ an neih loh nan ṭan an lak thu sawiin, sorkar chuan an ba rulhna tur a ngaihtuahsak thu a sawi.