Nagaland chief minister Neiphiu Rio chuan nikum December 20-a state Assembly-in Nagaland-a Armed Forces (Special Powers) Act (AFSPA), 1958 hlih phutna resolution, member-ten lungrual taka an lo siam tawh angin state cabinet chuan sorkar laipuiah he dan hi hlip turin a phut nawn leh dawn tih a sawi.
Kohima-a Nagaland Civil Secretariat Plaza-a Republic Day lawmnaah Chief Minister chuan he thu hi a sawi a ni. Mon district-a security force-ten an kahhlum, civil mi 14 chhungte chu a tawrhpui thu sawiin, he thil thleng chhuitu Nagaland Police Investigation Team chuan an thil chhuina kawngah hma an sawn zel thu a sawi bawk.
CM chuan Indian Army pawhin Court of Inquiry dinin, Mon district-a civil mite kahna thleng chungchang hi a chhui a, anni pawhin an chhui zo dawn hnai tawh nia sawi a ni, a ti.
Nagaland leh Manipur-a Naga pawl hrang hrangte chuan Mon-a inthahna thleng leh, Naga political issue chinfelna tur tikhawtlai a nih zel avanga lungawi lohna lantirna atan Republic Day lawmnaah tel lo turin mipuite an lo ngen tawh a ni.
Naga pawl lian, Eastern Nagaland People's Organisation, All Naga Students' Association leh United Naga Council-te pawhin Nagaland-a AFSPA hman mek chu na taka dodalin, dan sakei tia sawi ṭhin hlip turin sorkar laipui an phut.
