Meghalaya CM-in Covid-19 protocol bawhchhia ; Covid positive chungin hnam puanzar a pawtpharh

Meghalaya chief minister Conrad K Sangma chuan Nilaini khan Covid-19 positive a ni chungin Polo Ground, Shillong-a Republic Day lawmnaah hnam puanzar a pawtpharh. Hei vang hian social media lamah sawiselna a tawk nasa hle a, midangte hriselna dinhmun derthawnga dahsakah an puh.

Chief Minister hian January 21 khan Covid hri a kai thu leh, mild symptom a neih thu hi a puang a ni. January 10-a health department in standard operating procedure (SOP) thar a tihchhuahah, Covid hri kaite chu ni sarih inkhung hrang tura tih an ni a, a zawna ni thum chhung khawsik an neih chuan ni sarih hnuah an chhuak thei tih a ni.

Mahse CM Sangma hi January 21-ah a positive tih a puan hnuah, a inkhung hun pawh a ral hmain Republic Day lawmnaah hian a tel a ni. Thawhlehni khan office pawh a kal nia sawi a ni bawk. Hetihlai hian Governor Satyapal Malik pawhin Covid hri hi a kai a, mahse in lamah inkhungin Republic Day nia 'At Home' ceremony hman ṭhin pawh ṭhulh phah a ni bawk.