Assam-in Meghalaya hnenah Vaishnavite sattras 11 hlan dawn

Assam-Meghalaya state ramri buaina chinfelna tur atana give-and-take policy hman an remtih angin, Assam sorkar chuan ramri-a ram sq km 18.29-a zau chu Meghalaya hnenah a pe dawn a, hetah hian sakhaw biakna hmun vaishnavite sattras 11 a tel dawn.

Assam chief minister Himanta Biswa Sarma leh Meghalaya chief minister Conrad K Sangma-te chuan union home minister Amit Shah hnenah report thehlutin, 'give-and-take' policy hmanga inremna siam an remtih thute an hrilh tawh a ni. State pahnihte rawtna thehluh hi sorkar laipuiin a pawmsak chuan vaishavite sattras 11-te hi Meghalaya state lamah an bet dawn a ni.

Assam-a sakhaw pawl lian ber, Assam Sattra Mahasabha (ASM) chuan sorkar thiltih tum dan hi an remti lo tih an sawi a, heng sakhaw hmunte hi Kristian state, Meghalaya hnenah hlan an remti dawn lo tih an sawi.

ASM principal secretary Kusum Kumar Mahanta chuan Assam sorkar chuan Arunachal Pradesh, Nagland leh Mizoram nena ramri buaina a neihte chinfelna atan give-and-take policy bawk hi hman a tum em tih a zawt nghal bawk. Give-and-take policy hman zel a nih chuan Assam chuan an state-a thingtlang khaw tam tak a hloh phah dawn a, he ruahmanna hi an dodal tlat tih sawiin, Assam sorkar chu ramria cheng mipuite hmasawnna tur ngaihtuah sak zawk turin a ti.