National Child Award for Exceptional Achievement tia hriat ṭhin, Pradhan Mantri Rashtriya Bal Puraskar 2021 chu hmarchhak biala naupang paliin an dawng. He chawimawina hi kum 18 hnuai lam civil mi chawimawina sang ber a ni.
Pradhan Mantri Rashtriya Bal Puraskar dawngtute chu Tripura mi Arshiya Das, Manipur mi Vanish Keisham, Sikkim mi Ayush Ranjan leh Assam aṭangin Tanuj Sammdar te an ni a, nimina Republic Day lawmnaah chawimawina hi hlan an ni.
Kum 10 mi, Arshiya Das hian International leh National Chess Championships-ah Gold a la a ni. Kum 15 mi, Vanish Keisham hi lemziak thiam niin, international, national leh state-level competition-ah lawmman vawi tam tak a lo la tawh. Sikkim aṭanga chawimawina dawngtu, kum 15 mi Ayush Ranjan hi 'Serial Innovator from Sikkim' tih niin, DigiSmart Bin, Garbage Billing Platform leh Auto LPG Refilling software te a siam a ni. Kum 16 mi, Tanuj Sammadar hi lemziak thiam niin, colour pencil, oil leh water colour bakah charcoal leh acrylic hmanga lem ziam thiam tak a ni a, Art and Culture caterogy hnuaiah he chawimawina hi a dawng bawk.
Kuminah hian Pradhan Mantri Rashtriya Bal Puraskar hi mi 32 in an dawng a ni.
A thih hnuah Tarun Gogoi-a'n chawimawina dang
Assam chief minister hlui Tarun Gogoi chu a thi hnuah civil mi hnena chawimawina sang ber, Padma Bhusan award hlan a ni.
Republic Day-a Padma Bhusan hi mi 10 hnenah hlan an ni a, an zingah hian mitthi tawh Tarun Gogoi bakah union minister hlui Ram Vilas Paswan leh Gujarat chief minister hlui Keshubhai Patel te an tel. Term thum chhung Assam CM ni thei, Gogoi hi nikum November 23 khan a thi a ni. Kum 1971 khan a ṭum khatna atan Lok Sabha MP atan thlan a ni a, kum 2001 thleng Lok Sabha member a ni. Kum 2001-2016 chhung khan Assam Chief Minister niin, state CM ni rei thei ber a ni bawk.
