Assam-a MLA hausa tawntaw awm zat a let 5-in pung

Assam Legislative Assembly-a MLA ni lai zinga 56% chu mi hausa tawntaw, crorepati an ni a, kum 2006 aiin MLA crorepati awm zat hi a let nga in an pung a ni. 

Association for Democratic Reforms (ADR) leh Assam Electoin Watch report-a a landanin, MLA ṭanglai 119 zinga 67 chu crorepati, cheng vaibelchhe khat chuang nei an ni. Kum 2006 khan Assam MLA zingah crorepati  15 an awm a, kum 2011-ah 47 awmin, tunahchuan 67 an tling tawh. An zinga hausa ber chu Asom Gana Parishad (AGP) MLA Naren Sonowal a ni a, cheng vaibelchhe 33.94 hu a nei. MLA zinga rethei ber chu IAUDF MLA Sahah Uddin Ahmed niin, a thil neih hlut zawng chu cheng nuai 1.81 a ni thung. 

MLA ṭanglaite thil neih zat hi chawhrualin Rs vbc 2.47 a ni. Party hrang hrang zingah BJP MLA 59 zinga 34 (58%) chu crorepati an ni a, Congress MLA 20 zinga 11 (55%), AGP MLA 13 zinga 10 (77%), BPF MLA 12 zinga 7 (58%) leh AIUDF MLA 14 zinga 5 (36%) te chu cheng vaibelchhe khat nei tling an awm.