North East Indigenous People’s Forum (NEIPF) chief convener, Anup Chetia chuan Thawhlehni khan ramri-a buaina an tawh fo tihrehna turin Meghalaya leh Assam state-a ram leilung fate inkarah inkungkaihna ṭha siam a pawimawh tih a sawi.
Anup Chetia chuan Assam leh Meghalaya chuan ram inrina enfel tur leh a hmuna thil nihdan tak enfiah turin NGO joint committee pawh an siam thei tih sawiin, state inṭhenawmte karah hian inṭhianṭhatna siam a pawimawh tih a sawi bawk a ni.
Thawhlehni khan NEIPF Meghalaya Chapter meeting-a thu a sawinaah Chetia chuan April vela hi chuan ramri chu tlawh theih nise a duh thu a sawi. Ramri-a state pahnih mi leh sa awmte nen chuan meeting an buatsaih theih thu leh cutural program-te pawh buatsaih ho theih a nih thu a sawi.
Chetia chuan state pahnih inkara inṭhianṭhatna siam chuan ramri chungchanga buaina pawh a chinfel theih ngei a rin thu a sawi. Karbi Along-a khawtlang hruaitute pawh a kawm tawh thu sawiin ramri-a cheng Khasi-te nen an inkarah boruak chhia a awm lo tih a sawi bawk.
NEIPF chief convener chuan ramri-a buaina awm ṭhin chu district thuneitute siam a nih thu sawiin district thuneitute chuan ‘divide and rule’police an kalpui tih a sawi. District thuneitute chuan ramri-ah boruak muanawm a awm an duh lo a ni, a ti.
Chetia chuan Assam leh Meghalaya ram leilung fate chu inthuruala Nepalese ten ram an inchuh lai an neihsak lohna tura bei turin a chah a, Boko side-a buaina chhuak ṭhin pawh Nepalese, henglaia chengte siam a nih thu a sawi.
