NEIPF/ULFA hruaitu in Meghalaya CM fak

North East Indigenous People’s Forum (NEIPF) chuan Thawhlehni khan meeting neiin NEIPF Chief Covener chuan Meghalaya Chief Minister, Conrad K Sangma chu Citizenship (Amendment) Bill, 2016 chungchangah nghet taka a din avangin a fak hle.

NEIPF chief convener leh United Liberation Front of Asom’s (ULFA) General Secretary ni bawk Anup Chetia chuan Meghalaya Chief Minister chu CAB chungchangah nghet taka a din avangin a chungah an lawm thu sawiin, NPP chu BJP kaihhruai NDA-a tel ni mah se CAB dodalna kawnga nghet taka a ding chu an fak thu a sawi a ni.

NEIPF chief convener chuann an forum chuan bill chu an dodal zel dawn tih sawiin BJP kaihhruai sorkar chuan hmarchhak mipuite nihphung leh tihdan phung danglam bik tak chu tihbo an tum tih a sawi.

Chetia chuan hmarchhak mipuite chu bill dodalna kawngah an inthurual a ngai hle nia sawiin, BJP leh RSS-te chuan an politics ham­ṭhatna duhna avang ringawt­in ram leilung fate nihphung leh tihdan phungte chu tihbo an tum niin a sawi bawk.

ULFA GS hian nimin khan CM Conrad Sangma hmu in CAB chungchangte a sawipui a ni.

Chetia chuan hmarchhak pumpui chu Sangma dinna avang chuan an lawm hle nia sawiin, Assam mipuite tan bik phei chuan chona lian tak a nih thu a sawi.  Conrad Sangma ang hruaitu chu Meghalaya mai ni lo hmarchhak pumpuiin an mamawh niin a sawi bawk.

ULFA hel pawl hruaitu leh NEIPF hruaitu ni bawk chuan sorkar laipui chu bill pawm lo tura vau zuiin hmarchhak pumpui chuan na takin an dodal thu a sawi a ni.