Kum 2025-a Ṭhazual Gospel chart hmasa berah R. Lalrinmawii (Arini) chuan 'Ka tan a tawk' tih hmangin hma a rawn hruai a, kum bul a rawn ṭan ṭha nghal hle.

Arini aw ṭhat leh zaithiam zia sawi nawn a ngai lo, hun eng emaw chen chu Mizo hmeichhe gospel artist ṭha ber zingah a lang tawh a ni. 'Ka tan a tawk' tih hla hi Mangheta Jahau phuah niin, music hi Kima Chhangte siam a ni. HC Records-ah recording hi tiin, video hi 75 Visuals siam a ni. He hlaah hian naupangten puiin, anni hi Mawimawii, Ropuii, Rinrini, Albert, Bony leh Tetea te an ni. A hla a mawiin a ṭha a, a satuin a thiam a, a video pawh en a nuamin thlir leh ngaihthlak al a hlawh zui zel ang.

Champhai lam gospel band ṭha, Amosa Vocal Point chuan 'Chu ram mawiah chuan' tih chu No 2-ah an rawn lanpui a, an zai nungin ngaihthlak a nuam a, mi tam tak khawhar leh lunglen hnemtu a ni ngei ang. Gospel band lar, One in Christ 'Ni ropui' chu No 3-ah awmin, zaithiam leh hlaphuah thiam Jonathan Lianhna 'Ka chawrchhuahna' leh Lalramnunmawii 'Hril ka nuam' medley chu Top 5-ah an lang bawk.

Ṭhazual Gospel Top 10-ah hian HC Lalramchhani (Nu-i) & C. Lalhmingmawii; KṬP, Chanmari West Branch, Cheryl leh Vincy bakah MS Dawngliana te an lang bawk a ni.