LucyB in Best Cultural Narrative award dawng

India ram pum huap, National Designer Awards season 7 chu nikum, kum 2024 kumtawp lam khan neih niin, hetah hian Mizo designer Lucy Lalnunmawii (LucyB) d/o B.Hrangzamlova Chinga veng chuan a ethnic design hmangin Best Cultural Narrative Award a dawng.

National Designer Award hi World Designing Forum in kumtina a buatsaih ṭhin niin, season 7-ah hian Lucy hian tel tura sawmna a dawng a ni. Online-in meeting interview te an nei a; drawing, story board, mood board theme inspiration te thehlutin inelna hi an ṭan a ni. 'Upcoming designers' (designing lama kum thum aia tam lo lut ) zingah telh niin, inelna zingah hian 'Ethnic' leh 'Indo Western' design a thlang a ni. A design-ah hian Mizo hnam incheina leh kutchhuak tam thei ang ber a hmang. Goa-ah final stage hi neih niin, show anga kalpui ani a, an design hi model-ten an ha a, judge-ten a hmunah hian an enfiah leh vek bawk. "Ethnic" design chu "Best Cultural Narrative" award dawng tura thlan a ni ta a ni.