Hyun Bin leh Son Ye Jin ten damlo tan ṭanpuina pe

South Korean actor, Hyun Bin leh Son Ye Jin te nupa chuan kum 2025 chu mi dang tana luangchhuakin bul an ṭan.

Asan leh Samsung Medical Center-a paediatrics leh obstetrics-gynaecology department tan won mtd 150 ve ve pein, ṭanpuina atana an sum pek hi USD 203,934 a tling. "Mi dang ṭanpui theia kan awm hi kan lawm hle a ni,"tiin an fapa hrisel ṭha taka a ṭhang chho an hmuh laia naupang ṭhenkhat, vannei tawk lote dinhmunte an ngaihtuahin hrehawm an tih ṭhin thu an sawi. Naupang damlo te chu an lo dam ṭhat a, hrisel leh hlim taka hun an hman chhoh an duhsak thu an sawi. Hyun Bin leh Son Ye Jin te hi K-drama lar tak, 'Crash Landing on You' a an chan dun hnuin an in date zui a, kum 2022 March thla khan inneiin, hemi kum November thlaah fapa, Alkong an nei a ni.