Pixar sequel, 'Inside Out 2' chuan box office-ah thawm a la nei lian hle. A kar hnihnaah USD mtd 100 lak luh belh lehin, animated movie zingah kar hnihnaah sum la lut tam ber record a siam belh leh. Hemi hmaa record lo siamtu chu USD mtd 92 la luttu, 'The Super Mario Bros. Movie' a ni.
'Inside Out 2' hian tlangzarh aṭanga kar hnih pawh a pum hmain USD mtd 724.4 a hmu chhuak der tawh a, heng zinga USD mtd 255.2 hi US leh Canada aṭanga a hmuh a ni. Kum 2024-a film chhuak zinga sum la lut tam ber dinhmun a hauh tawh a ni. Sum a la hmuh belh zel a rinawm bawk a, 'Barbie' hnua USD tld la lut thei hmasa ber ni tura ngaih a ni.
Kuminah film lar chhuak pawh awm nual tawh mah se box office lamah beisei angin thawm an nei lian ṭhin lo a, ticket sales hi Covid hri len hma lam aiin 40% velin a hniam a ni. Mahse 'Inside Out 2' hian box office lam boruak pawh a rawn chawk nung a, critics leh audience lam fak pawh a hlawh hle. He film hi Aizawlah pawh en theihin a awm a, Rempham'Ly-ah an chhuah thei a ni.
'Bad Boys: Ride or Die' chu a kar thumnaah No 2-ah a la awm thei a, USD mtd 18.8 a hmuh belh leh. 'Bad Boys' sequel, Will Smith leh Martin Lawrence channa hian North America-ah USD mtd 146.9 a hmu chhuak tawh a ni.
