Khiangte Construction Ṭhazual Gospel chart-ah Mizo gospel band daih rei, zaia rawngbawlna nei tura sawm hlawh ber zinga mi, One in Christ chuan an hla thar 'Nang hnaihin' tih hla hmangin hma an hruai.
One in Christ tan kumin hi an kum 13-na a ni a, term tharah hian leader Alvin Lalruatfela niin, assistant leader Christina Vanlalnghaki, secretary-ah Zomuansangi Pachuau niin, anni bakah Malsawmtluangi Hrahsel, PC Malsawmtluangi, Lalthanzami Renthlei leh C. Lalramngaihzuali te an ni.
Chart-a no. 1 an nihpui, 'Nang hnaihin' tih hla hi sap hla lehlin niin, Mizo ṭawnga letlingtu hi Lalrempuia a ni. Music video hi kumin January 22-ah tichhuakin, music hi Andrew Vanchhawng siam a ni a, recording hi Studio A-16-ah tiin, video hi Hebron Pictures siam a ni. An zai thiamzia sawn nawn a ngai lo a, Pathian fak leh ngaihna hla nung takin an sa chhuak reng thei a, ngaihthlak leh lawm an hlawh reng mai a ni.
Zorinsanga Sailo pawhin a hla thar, 'Sam 23' chu chart hmasaa no. 9 aṭangin no. 2-ah a rawn chhohpui. He hla hi Mizoram Synod hnuaia family guidance & counselling centre-in Kristian chhungkaw short film insiamsiak a buatsaih ṭuma Ramhlun North Presbyterian short film OST a ni. Thlir leh ngaihthlak a manhla hle. Pathumnaah Lalfakzuali 'Zion zun leng' a rawn lang a, The B4 'Ram ni tla ngai lovah chuan' chu palinaah awm bawkin, Top 5 hi Lalfakawmi chuan 'Davida lam' hmangin a rawn khar.
Ṭhazual Gospel chart tharah hian Top 10-ah Esther Khiangte, Lalhmudiki, Sanga Renthlei, Priscilla Laldinpuii Fanai leh Mawimawii te an lang bawk.
