Eurovision 2024 : Israel-in October Rain lyrics thlak remti

Kumin May thlaa Eurovision Song Contest-a an tel ve-na tura Israel-in hla a theh luh, October Rain lyrics chu organiser lamin an phut angin thlak an remti.

Israel broadcaster, Kan chuan entry atan hian October Rain leh Dance Forever hlate a thlang. October Rain hi nikum October thlaa Hamas-hoin Israel an beih chungchang an kawhtirna a ni a, mahse, organiser lam hian politics kaihhnawih tel an duh loh avangin an lo dang a, hemi hnu hian Israel president Isaac Herzog chuan show-a an ram an tel ve ngei theihna turin a ṭul dan anga siam rem a nih tur thu a sawi a ni. Hemi hnu hian Kan chuan hla an thlan pahnih phuahtute hi biain, hla phuahtu an nihna anga an zalenna humhimsak chungin, an hla thu hi siam ṭha turin an ngen tih an sawi. Israel aiawh hian kum 20 mi, Eden Golan a inlan dawn a ni. European Broadcasting Union hian a hmain ram ṭhenkhat aiawhte chu an hla thu thlak turin a lo ti tawh a ni. Kum 2009 khan Georgia chuan an hla theh luh, 'We Don't Wanna Put In' tih chu Russia president an sawina a nih avangin hnawlsak a ni a, show aṭangin an inhnuhdawh phah tawh bawk.