Khiangte Construction Ṭhazual Lengzem chart thar berah Mizo Idol Season 7 top 10 hial inhlangkai thei, Vanlalngaihsaka chuan a single hmasa ber "Thumal Pathum" hmangin pakhatna dinhmun a rawn luah ta!
Thumal pathum = Ka hmangaih che
Saka hi kum naupangte la ni mah se, a single hmasa ber "Thumal pathum" hi ama phuah a nihna hian he hla hlutna hi a belhchhah hle. Zaithiam piah lama hetiang anga hla ṭha; ṭhalai lawm hlawh zawng tak a rawn tichhuak zel thei a nih chuan a hming hi kan la lam nawn fo turte zinga mi a tih theih awm e. He hla mawina belhchhah tura mi ṭangkai, backing vocals lo petute hi Mizo Idol lama a ṭhiante - Deborah leh Hmangaihi te an ni. Kingpin's Production hnuaiah he MV hi tihchhuah niin, Music leh Recording hi Lord's Audiocraft Production-ah neih a ni thung. Video mawi tak min entirtute hi Anthony Wowv leh Didika Chhangte te an ni a, Lead Guitarist-ah Thanthawnga (T.Melody) class kan hmu bawk a ni.
David nge Vanzara chungnung zawk dawn?
Chama Khawlhring-i'n kum 2003 vela a phuah "Lungdum" hi Mizo hla hit ber pawl rawn ni chhoin, zaithiam fam ta Gnat Lalrinchhana'n a album hmasa berah khan a lo sa tawh a, hun rei tak hnuah David Lalchawisanga Darlong chuan rawn cover lehin, a hla mawina a rawn phawkchhuak chiang leh hle a, pahnihnaah a rawn lanpui ta a ni.
Zaithiam hming chher mek Vanzara "I mawi ngei e" pawh chart-a hmasawn chak ber zinga mi niin, parukna aṭangin top 3 ah a rawn invawrh chho tawh a, David-a nen pakhatna ni thei turin dinhmun ṭha takah an ding mek.
Chart-a hla lang dang te chu...
Mercy Remsangmuani chuan "Lai mi ka ni si" hmangin Lai ram mawina rawn tarlangin palinaah a rawn lang a, Sabina Somi chuan hla mawi leh dangdai tak "Ruahpui Vanawn" a rawn surtir a; a phu ang ngeiin top 5 a rawn chuangkai bawk a ni.
Anni bakah hian HT Lalthanzami, Ngurthansanga, Em es Hauzel, Lalrinmawia Chawngthu leh Slickjive-te chu chart a lang dangte an ni.
