Lady Gaga-i'n Harley Quinn nihna a phawkchhuak pha dawn em?

Joker chhunzawmna ngahhlelhawm tak, "Joker: Folie a Deux" shooting chu ngawrh taka neih chhoh mek niin, Lady Gaga pawh Harley Quinn angin hmuh a ni ta. He role nihna pawimawh tak hi a rawn phawkchhuak thei dawn em tih chu mipui zawhna a ni mek.

Joker sequel hi Manhattan khawpui, New York County Supreme Court-ah shooting hi neih mek a ni a, Quinn traditional dress famkim nena inthuam Gaga hi police uniform nena inthuam mi ṭhahnem takin an hual vela, eng pawi nge a thlen dawn tih pawh hriat chakawm tak a ni.

Kumin Valentine's ni takah film director, Todd Phillips chuan a Instagram page-ah Gaga leh Joaquin Phoenix lanna leh official poster hmasa ber chu a lo tlangzarh tawh a ni.

Official-a puanzar la awm lo mah se, Gaga hian Gotham City, Arkham Asylum-a psychiatrist Dr. Harleen Quinzel role a play dawn niin a lang a, Fleck zuna a uai dan chungchang tarlan a ni bawk ang.

"Suicide Squad" (2016), "Birds of Prey: And the Fantabulous Emancipation of One Harley Quinn" (2020) leh, "The Suicide Squad" (2020)-ahte hnehsawh taka Harley Quinn lema lo chang tawh Margot Robbie pawhin Gaga tluka he role inhmeh a hriat loh thu sawiin, a tawp thlenga a thlawp tlat tur thu a lo sawichhuak tawh nghe nghe.

Joker film hmasa zawka a hmel kan lo hmuh tawh Zazie Beets chuan Sophie Dumond role a chan chhunzawm dawn a, Brendan Gleeson, Catherine Keener, Jacob Lofland leh Harry Lawtey-te hmel pawh kan hmu leh dawn a ni. Joker 2 hi kan la nghah rei deuh a ngai dawn; US theatre-ah October 4, 2024-ah tlangzarh a ni ang.