Box Office-ah The Marksman bawkin sum a lalut tam ber leh a, The Croods: A New Age chu sum lalut tam ber dawttu niin Wonder Woman 1984 chu pathumna a ni thung.
Thil thar awm lohna Box Office
Kar tawp Box Office-ah khan thil danglam teh hluai thleng a awm lo a, chart hmasaa sum lalut tam pathumna The Croods: A New Age chu pahnihnaah a rawn inhlangkai ve leh thung a, Wonder Woman 1984 chu pathumnaah a tla thla thung.
The Marksman hi theatre 2,018-ah kar tawp liam ta khan tihchhuah a ni a, $2,029,944 a lalut. The Croods: A New Age chu theatre 1,876-ah pe chhuak thungin $1,795,845 a lalut a, Wonder Woman 1984 chuan theatre 2,013 aṭangin $1,600,000 a lalut ve bawk a ni.
Box Office a BORING
Hripui lengin film industry a nghawng nasa a, khawvelin a buaipui luai luai khawpa film lian tlangzarh a ni meuh lo. Film lian tham siamna atan hian $maktaduai 200 chuangte an seng ṭhin a, chutiang a nih avang chuan studio liante'n an big budget film an tlangzarh ngam rih meuh lo.
Chu chuan Box Office-a ti boring a, nikuma Tenet leh Wonder Woman 1984 tlangzarh a nih hnuah miin an ngaihven luai luai film tlangzarh a ni meuh lo a, chumi avang chuan Box Office-ah thil thar hmuh tur a tam lo hle a, sum chevel pawh a tlem hle.
Tuna pakhatna ni mek The Marksman hian $2,029,944 a lalut a, hri len hma, boruak a pangngai lai kha chuan hetiang zat sum hi lalut film hi chu top 10-ah pawh an lan phak loh chang a tam ṭhin hle a ni.
Film thar
Pariatna Our Friend chu top 10-a film thar awm chhun a ni. Box Office Mojo chart tihchhuahah chuan 13-na No Man's Land chu film thar a ni bawk a, 16-na Psycho Goreman pawh film thar a ni bawk.
