Ṭhalai kutchhuak lehkhabu Thulovi Thu Tlangzarh

Mizoram University-a Mizo subject-a MA zirlai Gladys Lalhruaitluangi lehkhabu ziah, 'Thulovi Thu' tih chu nimin khan Vanglaini joint editor Lalnghinglova Hmar-in a tlangzarh.

Pachhunga University College Seminar Hall-a tlangzarhna hunah H Laldinmawia, PUC Mizo Department-a zirtirtu chuan thiam takin lehkhabu thlirna a nei a, ṭhalai lehkhabu, ṭhalai kam chhuak, huaisen taka zep awm loa inpuanna thu leh hla ngaihnawm tak a nih thu a sawi.

Thulovi Thu hu phek 140-a chhah niin hla hril (poem) 116 a awm a; lehkhabu chhuahtu Mizoram Publication Board chuan, "Ṭhangtharte tuipui zawng tak tur lehkhabu kan lo nei ta hi a lawmawm hle mai," tiin an ziak a ni. A ziaktu hmeichhia a nih angin hmeichhe dinhmun a ziak lang a, ṭhalai a nih angin ṭhalai harsatna tawhte a thai lan bakah mihring nun chhungril inpuanna thute a tel bawk. 

Lehkhabu chhunga hla hrilte hi a tunlaiin a ṭhalai em em a, chutih rualin thu leh hla lam aṭanga thlir pawhin lehkhabu hlu tak, Mizoten kan neih tam loh lam tak lehkhabu - ṭhalaite mil tura ṭhalai kut chhuak a ni.