Zonet Ṭhazual Award vawi 6-na chu Ningani zan aṭang khan sem ṭan a ni ta a, Rini Hlondo host-na hnuaiah Ningani zanah khan Gospel huangchhunga award hrang hrang semna neih niin TV leh internet kaltlanga thlir eng emaw zat an awm a, a hmunah erawh sorkarin inkaihhruaina dan khauh tak a siam avangin chhimtu an awm lo thung.

Gospel huanga category hrang hrang a ngaihnawm hlawm a, award dawn phu ṭhiau nominee-a chhawp chhuah an ni bawk nen tu ber nge category hrang hrangah award dawng ang tih hriatthiam har tak karah category ngaihnawm ber zinga mi Best Female Artist Gospel award chu Champhai nula H Lalremruati (Maruati) kutah hlan a ni. Best Male Artist Gospel award chu Zorinsanga Sailo kutah hlan a ni ve bawk.

Nomination an ṭha a, Bethsy, Cindy, Fiona, Grace leh Maruati-te hming intlar thla ṭhiau karah kumin chhunga Zonet Ṭhazual Gospel artist hmeichhe zinga ṭha ber atan Maruati hi thlan chhuah a ni ta a ni. Maruati hi nikum pawh khan Ṭhazual Award Best Female Artist Gospel-ah thlan a lo ni tawh bawk a, tun kum hnih chhung chu Gospel singer hmeichhe zinga huhang nei ngah ber a ni tih loh rual a ni ta lo.

Best Male Artist Gospel Award chu 'Min hual reng ṭhin' tih hla thiam taka satu Zorinsanga Sailo kutah an hlan. Nominee ṭha tak tak zingah Zorina kutah he award hlu tak hi hlan a ni ta a ni.

One in Christ ft. Isaac chu Best Group/Duo Gospel award dawngtu niin OiC Leader Alvin-a chuan an award dawn chu an member fam ta Lalruatdiki puala an hlan thu an sawi a, anni hi hemi zanah hian perform nghal bawkin an hla sak pawh Ruatdiki puala an sak a ni bawk.

Best Music Video Gospel award chu Lalthlengliani Jongte kutah hlan a ni a, tin Fiona Pachuau leh Crosscraft-te'n thiam taka an sak 'Fak hla rimawi' phuahtu Zosangzuala chu Best Song Writer Gospel atan thlan a ni a, Stacy Punte chuan Best New Artist award a dawng ve bawk a ni.

Best Female Artist Gospel    Maruati

Best Male Artist Gospel    Zorinsanga Sailo

Best Music Video Gospel    Lalthlengliani Jongte

Best Songwriter Gospel    Zosangzuala Pachuau

Best Group/Duo Gospel    One in Christ ft Isaac Hnamte

Best New Artist    Stacy Punte