Lalnunpuia Hrahsel Hlate Music Video Album Vol. 5 tlangzarh

Lalnunpuia Hrahsel Hlate Music Video Album Vol. 5 chu Upa Lalrammawia Ngente-in Ilmov Foods, Vaivakawnah nimin khan a tlangzarh. 

He music Video album thupui hi ‘Aw, ropui ber’ tih niin Hlimhlimi'n a sa a, hla 7 dah niin tunlaia zaithiam hrang hrangin an sa a ni. Tlangzarh inkhawm chu Praise On star Arini’n a kaihruai a, J Zohmingthangan thlirlawkna hun a hmang thung. He albumah hian Mal zai - David Vanlalpeka, R.C Lalruatdika (Tetea), H. Lalremruati (Maruati), Stacy Punte, Hlimhlimi bakah Various artist hla hnih a awm.  

Lalnunpuia Hrahsel chuan Pathian rawngbawl nan leh ropui nana siam an nih thu leh Pathian tana kil khata rawngbawltu nih ve duhna vanga Music video album siam a nih thu a sawi. A album thupui ‘Aw ropui ber’ tih chu “Pathian thilsiam ropui zia leh mawi zia te, van zau zia, leilung leh a chhunga thil awmte ka enin ropui ka ti lutuk a, mahse, chungte chu Pathianin ‘Awm rawh se,’ tia thu maia a siamte an ni.

Mihring erawh chu kuta a siam, thisena a lei kan ni. Thil siam dang zawng zawng aia ropui leh mawiin Pathianin min siamzia ka ngaihtuah hian ropui ka ti lutuk a,” tiin a phuah dan a sawi. Heng hlate hi YouTube lamah thlira ngaihthlak zui theih a ni ang.