Bollywood 'A Lister' an tih chinten fing taka ngawih an chuh laiin Deepika Padukone chuan Jawaharlal Nehru University (JNU)-a tharum thawhna thleng a duh lohzia lantirin amah ngei JNU zirlaite punkhawmnaah Thawhlehni tlai khan a kal a, fak a hlawh rualin sawiseltu pawh an tam hle.
Deepika tel ve hma
Tun hnaiah CAA avanga India ram a inṭhen phawk laiin Bollywood star langsarte'n ngaihdan an sawi chhuak duh lo a, an ngawi. Chutihlaiin Bollywood mi pawimawh zingah CAA demtu leh dotu eng emaw zat an awm bawk a, BJP sorkar lam pawhin ṭan lain Pathianni zan khan Mumbai-ah Bollywood mi leh sa chu CAA sawipui turin Union Minister Piyush Goyal chuan a sawm khawm a, star langsar an inlan duh lo.
Hetihmeklai hian JNU-ah zirlai leh zirtirtute chu an university campus chhungah hmai tuam tu tih hriat lohte'n an bei a, a beitute hi BJP zirlai pawl ABVP niin an puh hlawm. ABVP lamin an inhnamhnawih loh thu an sawi bakah left party thlawptu JNU zirlai pawl hruaitu JNUSU president Aishe Ghosh leh a thawhpuite thil tih angin an puh lêt hlauh.
Aishe Ghosh hi hliam tuar zingah a tel bakah Hindu pawl pakhat Hindu Raksha Dal intite chuan JNU-a thil thleng hi an tih a nih thu an lo puang ve mek bawk. Police lamin an chhui chiang dawn a, chutihlaiin Delhi Police-te chet dan leh buaina chhuahlaia an chet duh miah loh danah JNUSU lam chuan Police-te leh pawi khawihtute chu inthurualah an puh ve bawk.
India ram a nghawng a, JNU thil thleng vangin university tam takah JNU zirlaite thlawpna leh tharum thawhna an duh lohzia an lantir a, Mumbai-ah celebrity ṭhenkhatte telin JNU thil thleng an dem thu an au chhuak.
Deepika a lo lang e
Thawhlehni tlai khan Deepika Padukone chu JNU zirlai pungkhawm zingah a lo lang hlawl mai. He Bollywood superstar hi Delhi-ah hian a film thar Chhapaak tilar tura zin a ni. Delhi-a a awmlai a ni a, JNU zirlaite hi a thlawp a ni tih lantir turin a va kal a, JNUSU president Aishe Ghosh pawh a va hmu nghe nghe.
Star langsarte an bihruk laia rawn lang ngam Deepika hian fak a hlawh a, Twitter lamah a mah thlawpna thu hmuh tur a tam hle. Hei mai hi a ni lo, hun rei lo te chhungin Twitter-ah follower thar a neih hnem phah hle.
Chutihlaiin Deepika chet dan hi mi tam takin an dem bawk a, chu'ng zingah chuan BJP politician tam tak an tel. A sawiseltu lam chuan ni hnih hnu leka an tihchhuah tur a movie thar Chhapaak tihlar a tumna niin an ngai a, a bikin
BJP mi leh sate'n an dem nasa zual.
Twitter lamah #BoycottChhapaak #BoycottDeepika tihte a lar a, a follower ṭhenkhatin an unfollow phah bawk a, amah sawiselna a tam hle. #IStandWithDeepika #RespectDeepika tia Deepika thlawpna lam an vawrh lar viau bawk a, social media lam mai ni loin India huap TV channel lian hrang hrangah Deepika chanchin hi an chaw tui ber a ni zui nghal.
