Ozzy Osbourne-a'n Elton John a thawhpui

Rockstar Ozzy Osbourne-a manager leh a nupui ni bawk  Sharon Osbourne chuan Thawhṭanni khan fan-te bengverh tak tur American TV chat show The Talk-ah a sawichhuak tlat mai.

Show co-presenter Carrie Ann Inaba-in 2020 chhunga Ozzy-a ruahmanna neih chungchang a zawhna chu chhangin, "Thil ṭha tam tak a ni. A fan-te zinga a kir leh theihna turin, nuam a tih lam a tih chhunzawm leh dawn a, chu chu tour neih leh a fan-te bula hun hman a ni. Chuan, music thar pawh a tel, a ṭha hle ang. Elton (John) nen pawh hla an buaipui a ni. Thil ṭha tam tak a awm," a ti.

Ozzy hian kumin chhung ngei hian album thar tihchhuah a tum thu pawh lo sawi tawh bawkin, a album title pawh 'Ordinary Man' tih a ni dawn tih a sawichiang tawh bawk. Hei hi a studio album 12-na tur a ni dawn a, Elton John nena an hla tihchhuah tur hi hetah hian a tel dawn em tih erawh engmah sawichian a la awm lo.

'Ordinary Man' album-ah hian Guns N'Roses bassist Duff McKagan leh Red Hot Chili Peppers drummer Chadd Smith-te pawh a thawhpui a ni. He album-a mi tur hla pahnih  ‘Under The Graveyard’ leh ‘Straight to Hell’-te chu a tichhuak tawh bawk.