Transformers star Megan Fox chu Korean War movie-ah a inlan a, tun ṭum chu war correspondent lemah a ṭang ve thung.

American actress lar Megan Fox hi nikum khan Korean War movie 'Jangsa-ri 9.15'-ah hian a inlan tur thu puan a lo ni tawh a, film chang tur hian Korea a pan tawh a ni. Megan Fox hian January thla khan Korea hi a thleng tawh a, shooting an nei mek a ni.

War correspondent lar
Kum 1950 khan Korea ram pahnih South leh North Korea-te chu nasa takin an indo a, hemi ṭuma mi langsar ber pakhat chu Marguerite Higgins.

American news reporter Marguerite Higgins hi chanchinbu lar tak New York Herald Tribune-a thawk niin, Korean war lai hian indona hmunah a kal chilh ṭhin a ni. A hna thawh ropui tak avang hian 1951 khan Pulitzer Prize for International Reporting hlan a ni hial a, a huaisenna leh a chanchin ngaihnawm tak hi tun thlenga sawi hat tling a la ni.

Marguerite Higgins lemah hian Megan Fox hi a chang a, indona hmuna a chet tlat dan hrang hrangin a khawsa ve dawn a - en chakawm tawh tak a ni. Megan hian hmeichhe zinga Pulitzer Prize for International Reporting dawng hmasa ber lema chan hi a inhmeh hle a, tuna aṭangin ngaihven a hlawh nghal hle a ni.

Jangsa-ri 9.15 hi South Korean film director lar Kwak Kyung-taek chuan a buaipui mek a, Megan Fox bakah hian Korean actor Kim Myung-min, rapper-turned-actor Choi Min-ho te pawh an inlan dawn a ni. A chhuah hun tur erawh tarlan a la ni loa, kumin chhungin a chhuah hman beisei a ni.