Mizo Idol Season 6-a la tling mi paruk te chuan zanin aṭang hian intihsiak hautak zawk an hmachhawn ṭan leh tawh dawn a, live music vek a ni tawh dawn. Zaninah hian guest artist mi pali an awm dawn bawk a, Mizo Idol star te an ni hlawm.
Live music vek
Top 11-ah contestant te live music leh sound track hmangin an intihsiak a, zanin aṭang chuan live music vek a ni tawh dawn. Mizo Idol ni thei mi paruk - Ticos Darhmingliana, Jonathan Lalengzauva, Malsawmdawngkimi, Immanuel Lalawmpuii, H. Lalnunsiami leh Jerry Lalrinawma te an la awm a, zan hnih an intihsiak hnuah top 4 thlan a ni ang.
Musician tur te hi - Nunmawia (Keyboard), Kimkima (Guitar), Erick Chenkual (Drums), Bruce Pachuau (Bass) leh Bobo Renthlei (Guitar) te an ni nawk a, contestant te tan pawh a thlamuan thlak hle ang.
Social media a ṭangkai
Top 11 aṭang khan social media lamah contestant te zai video upload ṭhin a ni a, hei hian tangkaina a nei. Contestant zingah viewer nei ngah an vannei a, chu chuan an Idol zinkawngah nasa takin a pui thei a ni.
Social media hi lar leh lar loh tehna ber pakhat a tling tawh a, chu chuan contestant zinga mipui ngainat hlawh bik a tarlang chiang hle bawk. Kan duh leh ṭan zawngte tan tih ve tur kan nei a, judge te thutlukna siam kawngah pawh nasa takin a pui thei a ni.
Fimkhur a ngai!
Contestant te zai hi hi Zonet YouTube Channel, Mizoram Idol Facebook Page leh Mizo Idol Instagram account-ahte post ṭhin a ni a, hmun danga mi chu pawm a ni lo. Hmun danga lo upload an awm ṭhin avangin fimkhur a ngai a, khing a chunga kan tarlan te chauh khian point a keng tel tih hriat tur a ni.
Guest artist
Mizo Idol tihlutu te chu he intihsiaka lo tel tawh zaithiam te an ni a, chung mite chuan lawm pawh an hlawh ṭhin hle. Zaninah pawh guest artist mi pali - Marina Vanhriatpuii Varte, Zorinsanga Sailo, Lalawmpuii Khiangte leh Lalremruati te awm dawn a, zaiin mipui an awi dawn a ni. Mizo Idol star zinga tun thlenga hriat hlawh zui te an ni hlawm a, an zai ngaihtlak pawh a chakawm tawh hle.
Marina-i hi tun thenga Ṭhazual chart-a la lang thei a ni a, Zorina Sailo zaithiam zia lah sawi nawn a ngai lo. Awmawmi nise hranghlui zaithiam K. Lalchamliana fanu a ni a, Mizo Idol-ah a theihna san zia a lo pho lang tawh. Maruati'n a hmunah a nau H. Lalnunsiami (Mami) zai a en dawn a ni satliah lo a, a perform dawn a ni.
Selesih boruak a nuam
Top 11 aṭangin College of Veterinary Sciences and Animal Husbandry, Auditorium, Selesih-ah show kalpui a ni a, boruak nuam tak hnuaiah contestant te an intihsiak. Stage a mawiin a changtlung em em a, TV lama lo thlirtute tan pawn en man hla tak a ni.
Selesih-ah hian intihsiak hi neih chhunzawm tur a ni a, show hmuhnawm leh changtluk zawk en tur a awm dawn. Top 6 te hi zanin leh Zirtawpni zanah an intihsiak dawn a, Mizo Idol Season 6-a top 4 inhlangkai te chu Zirtawpni zan vek hian puan nghal a ni ang.
