Mizoram-a International Short Film Festival-ah Bollywood super star Gulshan Grover a lo kal dawn
Mizoram chuan September 20-22 chhung khian a vawikhat nan 'International Short Film Festival' a thleng dawn a, bollywood super star Gulshan Grover chuan Mizoram leilung a rawn rap dawn a ni.
Film festival hi Aijal Club-ah neih a ni dawn a, lemchan khawvela hriat hlawh tak tak an lo kal dawn a ni. Festival-ah hian short film intihsiakna neih a ni nghal dawn a, a tel duh tan September 12, chawhma dar 10 thleng thehluh theih a ni. Film hi minute 20 aia sei lo a ni tur a ni a, Mizo ṭawng emaw, Zohnahthlak ṭawng danga siam a nih pawhin English sub-title a awm tur a ni.
Fiction film emaw documentary film a ni tur a ni a, a duh apiang tan tel theih a ni bawk.
Gulshan Grover maw!?
Bollywood khawvelah Gulshan Grover hming a langsar a, film pawh 400 chuang zet a chang tawh. Indian actress lar Katrina Kaif te pawh lo chanpui tawh Gulshan Grover hi Mizoram-in film festival a thlen zarah a takin kan hmu thei dawn a ni. A film siam 'FORBIDDEN' chu tlangzarh a ni dawn bawk a, en hmaih chi a ni lo.
Kum 62 mi Gulshan Grover bakah hian Indian film director lar Umesh Shukla pawhin Aizawl a rawn pan ve leh dawn bawk. 'Oh My God' film siamtu Umesh Shukla hi kumin kum tir lam khan Mizoram-in 'Indian Film Festival' a thlen ṭumin a lo kal tawh a ni.
Mizoram International Short Film Festival 2018 hi Mizoram sorkar hnuaia Department of Information & Public Relations, Innovations India (P) Ltd. leh Mizoram Film Forum (MFF) ṭangkawp ten an buatsaih tur a ni.