Eminem-a'n studio a luhchilh leh nghal

Sawi lawk lem loa album a tlangzarh hnu lawkah, American rapper Eminem chuan studio a luhchilh leh tawh niin an sawi.

Eminem hian hla thar a buaipui leh ṭan der tawh niin an sawi a, rapper dang te tan chona thar a siam sak ngei ang. Tun hnaiah rapper lar thar an awm nual a, American rapper ropui Eminem tan pawh inthlahdah a thiang lo. Hei hi hriain album a tichhuah hnuah pawh hla thar a buaipui leh nghal chat a ni.

Shady Records producer Porter chuan,"Eminem hian a hna a ṭan leh tawh a, hun rei lo teah a inlar leh thuai ka beisei," tiin a sawi. Hei hian studio a luhchilh leh tawh tih a nemnghetah ngaih a ni a, fan te tan chuan lawmna tur hlir a ni.

Kum 45 mi lai ni ve tawh Eminem hian kar hmasa lawk khan hla 13 awmna 'Kamikaze' album a tichhuak a, chart hrang hrangah a dinhmun a sawh nghet chho leh mek.