'Silfai ang che' tih hla hi Lancy-i'n kumina a music video hmasa ber a ni a, Mizol Idol-a kan hmuh aṭanga a music video palina tur a ni. He hla hi R. Lalchhanhima hla phuah a ni a, ani hi Khumtung mi niin, a hla phuah pakhat, 'Chelh ding rawh' tih hla, lenglawng hla chu Pensy-i'n a hlawhtlinpui hle a, Zonet Ṭhazual chart-ah pakhatna vawi thum ngawt a nihpui tawh a ni. He hla aṭang hian Chhantea hla phuah a ṭhat theihzia a lang awm e. Chhantea hian a hla phuahte zaithiam hrang hrangte saktir video album a buatsaih mek.

Lancy-i hla kan hmuh hnuhnun ber chu 'Mangṭha' tih hla kha a ni a, chart-ah pakhatna hial a thleng chho thei a, nikum July thla aṭang khan chart-ah bul ṭanin, November 3 khan pakhatna hi a luah a ni. A hla hnuhnung ber a tihchhuah aṭanga thla ruk hnuah Lancy hla thar kan hmu leh chauh a, a kar a kh‚t hle.

Hmachhawp tam tak a nei a, amaherawhchu a hmachhawpte hi a tipuitling zung zung dawn loin a ang. Lancy chuan, "Music video thar siam leh mai tur chu ka ngah khawp mai a, hla pawh a ṭha hlawm a, amaherawhchu tunlai hi ka hriselna a pan deuh a, chuvang chuan kan rilrua music video siam ka duh deuhte pawh ka siam thei rih lo," a ti.

"Tuna ka music video thar hi a ṭha ka ti a, a hla thu pawh hi ṭha ka ti hle a ni. A video hi a hautak ang reng a, Pathian
ṭanpuina leh, camera man te, ka ṭhiante min puihna leh inpekna nasa tak avangin ka tihlawhtling ve thei chauh a ni," a ti. Video hi Gabriel Graphix Videography kutchhuak a ni.