Parliament monsoon session chu nimin Ningani khan zawh a ni ta a, bill put luh 26 pawm a ni. Bill thar hi Lok Sabha-ah 12 leh Rajya Sabha-ah 14 pawm niin, bill-te hi eptu pawl aubuaina leh lungawi lohna lantir a ni chunga pawmte a ni. Session tawp ni hian Lok Sabha speaker Om Birla chuan eptu pawlte chu house rorel an tihkaihlak ṭhin vanga rorelna mumal kalpui a harsat thu a sawilang.
Lok Sabha leh Rajya Sabha-a bill pawm zingah house pahnihin bill a pawm ve ve eng emaw zat awmin, LS leh RS-a bill pawm zingah The National Sports Governance Bill, 2025, leh The National Anti-Doping (Amendment) Bill, 2025 an tel. Bill pahnih hian ram chhung infiamna hrang hrang a nghawng thei ve ve dawn a ni. National Sports Governance Bill, 2025 chu president Droupadi Murmu-i'n hming ziah hnanin danah pawm a ni tawh bawk.
Rampum nghawng thei tur bill pawm zingah The Income-tax Bill, 2025, leh The Taxation Laws (Amendment) Bill, 2025-te house pahnihah pawm a ni bawk. Heng bakah hian Nilaini khan The Promotion and Regulation of Online Gaming Bill, 2025 chu pawm niin Rajya Sabha-ah pharh a ni lo thung. He bill hian online games hmanga pawisa khelhna khuahkhirhna tur a keng tel.
Parliament ṭhutkhawm neih chhungin The Bills of Lading Bill, 2025 chiah hi Rajya Sabha-a in aubuaina awm loa pawm awmchhun a ni. Monsoon session-ah hian eptu pawl harsatna thlen vangin eptu pawl tel loin bill pawimawh 19 pawm a ni.
