Union cabinet-in a pawm tak, Parliament thlasik ṭhutkhawmnaa pharh tura duan, ram puma a ruala inthlan buatsaihna tur, 'One Nation, One Election (ONOE)' chu Jammu and Kashmir-a party hrang hrang hruaitu ten an thlawp loh thu Inrinni liam ta khan an sawi chhuak.
J&K Chief Minister hlui leh Peoples Democratic Party(PDP) president ni bawk, Mehbooba Mufti chuan he dan thar duan kalpui tum chungchang ah hian BJP a dem thu sawiin,"India constitution tih chhiat tumna a ni" a ti. " India chu federal country a nih angin, Srinagar pawh federal structure hnuaia awm a nia, 'ONOE' kalpui tum hi federal structure tih bo a, dictatorship hman tumna" tiin a sawi zui bawk.
National Conference hruaitu, MP hlui Hasnain Masoodi pawhin he dan thar hman tum hi ramchhunga one-party system kalpui a nih theihna tura kawng sialna a nih thu sawiin,"India chu state in zawmkhawm a ni a, 'ONOE' hmang hian federal structure tih chhiat tum a ni," tiin a sawi
Communist Party of India (Marxist) hruaitu, legislator ni bawk MY Tarigami pawhin ONOE hi nasa taka dodalin, "He dan thar chhawpchhuah hian India, ram bung hrang hranga inrelbawl hrangte telkhawmin a siam tih chhiat tumna leh, tih dan phung hrang hrang awm mek humhimna tih chhiat tumna mai a ni" tiin he dan thar hman tum hi a thlawp loh thu a tarlang.
CPI(M) hruaitu hian sawi zawmin, Lok Sabha leh state assembly inthlan chuan nghawng in anglo tak an neih avangin leh harsatna an thlen dan chen pawh a in an loh avangin ONOE hi hman chi a ni lo a,"ram in relbawlna ṭha sa tih chhiat tumna leh dictatorship tih chak tumna mai a ni" tiin a sawi belh bawk.
One Nation, One Election hi prime minister Narendra Modi kaihhruai cabinet chuan kar liamta Ningani khan a pawm a, Parliament thlasik ṭhutkhawm neih mekah tun kar chhung hian pharh rin a ni a, mahse a pharh ni tur erawh sawi chian a la ni lo.
