Prime minister Narendra Modi kaihhruaia nimin, December 12, 2024 a union cabinet meeting chuan ram pum huapa a ruala inthlan buatsaih a nih theihna tur, 'One Nation, One Election' bill a pawm. He bill hi kar leh lamah Parliament-ah pharh a nih rin a ni.

Nikum September thla khan cabinet chuan 'One Nation, One Election' ngaihtuahtu tur siam rawtna hi a lo pawm tawh a ni. He rawtna hnuaiah hian ram chhunga inthlan hrang hrang - Lok Sabha, assembly, urban body leh panchayat inthlante chu ni 100 huam chhunga neih fel vek zel rawt a ni.

He rawtna ngaihtuah tur hian President hlui, Ram Nath Kovind kaihhruai high-level committee pawh din a ni a, anni hian an zirchianna chu March thla khan alo thehlut tawh a ni. Committee chuan inthlan hi a hran hrana neih a, hun a awh rei lutuk chuan sorkar inrelbawlna thlengin nghawng a tibuaiin nghawng a nei thei niin an sawi. A ruala inthlan buatsaih hian policy ṭha leh ngelnghet zawk siam phahin, inthlan buaipui hun sen tam lutukte a ti tlem ang a, vote thlak pawh an ṭhat phah zawk a rinawm thu an sawi.

Cabinet-a report an thehluhah, committee hian One Nation, One Election kalpui dan tur chungchanga rawtna hrang hrang 11 an tarlang a ni.

Committee in a zirchianna a tarlan hi phek 18,626 zeta chhah niin, stakehodler leh specialist hrang hrangte sawi hona te; September 2, 2203-a committee din a nih aṭanga ni 191 chhung zirhchianna an neih hrang hrangte tarlan a ni.

Panel chairman, Ram Nath Kovind chuan ONOE kalpuina turah hian sorkar laipui chuan party hrang hrangten an pawmtlan theih tura a siam a ngai tih a sawi. Ram chhunga Lok Sabha leh state assembly inthlan a ruala buatsaih chu party mal tana ṭha ni loin, ram pum tana thil ṭha a ni, a ti. Economist-te pawhin ONOE chu hman a nih chuan ram dinhmun pawh siam danglam theihah an ngai a, hman a nih chuan GDP pawh 1% aṭangin 1.5% ah a kai chhoh theih an ring a ni, a ti.