AAP-in hmeichhe tan thla tin Rs 1,000 pek tiam

Delhi-a rorellai, Aam Aadmi Party (AAP) chuan nakkum February thlaa Delhi assembly inthlan neih tur pualin, Delhi khawpuia cheng hmeichhiate tan thla tin Rs 1,000 pek an tiam. Inthlan naah AAP thlan tlin leh an nih chuan an pawisa pek hi Rs 2,100-ah tih pun a ni dawn bawk tih chief minister hlui, AAP national convener Arvind Kejriwal chuan a sawi. He hamṭhatna dawng tur hian in ziah luh erawh a ngai ang.

Kejriwal chuan hmeichhiate hnena hamṭhatna pekna tur scheme an duan hi chief minister Atishi kaihhruai cabinet meeting chuan nimin zing khan a pawm tih a sawi. Delhi-ah he scheme hi hman nghal a ni, ati bawk. Mahse inthlan neih hun tur hi ni 10-15 hnuah puan a nih dawn avangin, pawisate hi an account-ah thunsak nghal mai theih a nih rih loh thu a sawi tel bawk. AAP hruaitu chuan BJP in diklo taka jail a an khung chungchang hi an sawilang nawn leh bawk a ni.

Scheme thar chu society-a hmeichhiate dinhmun dawmkanna tur a nih thu Kejriwal chuan a sawi. Eptu lamin khawia pawisa nge pek tur awm ang? an tih chu chhang zuiin," 2015 inthlan dawna electric hman man awm lo tura ka tiam pawh kan ti hlawhtling thei a nih chuan kan ti thei a ni tih hi voter-te ka hriattir nawn duh a ni" a ti.

AAP hruaitu hian Delhi-a pawikhawihna thleng hluar lutuk chu BJP kaihhruai sorkar laipuiin dan leh thupek kenkawh na lam a ngaihthah vang a nih thu sawiin, a mimal X ah pawh Union home minister Amit Shah thlalak tarlangin a lo chhuah chhal hial tawh bawk.