2009-2019 chhungin boruak bawlhlawh vangin mi mtd 1.5 thi

Lancet Planetary Health journal-in a zirchianna a tih chhuah tharah, kum 2009 -2019 chhung khan India ramah mihring maktaduai 1.5 chuang thihna chu boruak bawlhlawh, PM2.5 pollution nena inzawmna nei a ni tih a tarlang.

He zirchianna neihah hian Ashoka University, Haryana, leh Centre for Chronic Disease Control, New Delhi pawh an tel. World Health Organisation-in mihring tana him china a sawi, PM2.5 level a sawi aia boruak bawlhlawhah India rama mi tld 1.4 chu an cheng niin an tarlang. Hei bakah hian India ram mipui zinga 82% dawn chu Indian National Ambient Air Quality Standards (40 microns per cubic metre) aia sangah an awm bawk. Kumtinin pollution hi 10 micron per cubic metre a pung zel ang leh he mi kaihhnawiha nunna chan thi kum tinin 8.6% a tling pha niin an tarlang bawk.

Heng zirchianna hi kum 2009 - 2019 inkara India ram chhunga district hrang hrang a data leh satellite data bakah, monitoring station 1,000 chuang aṭanga lak khawm niin thi zat hi Civil Registration System aṭanga lak khawm a ni thung niin zirchiang tute hian an tarlang bawk a ni.