Prime minister Narendra Modi chu November 16, 2025 hian ram pathum tlawh turin a zin chhuak a, Brazil-ah G20 Summit neih tur a hmang nghal dawn a ni.
Prime Minister hian Brazil a tlawh hmain Nigeria leh Guyana te a tlawh hmasa phawt dawn tih Ministry of External Affairs(MEA) chuan a tarlang. Nigeria chu an ram President Bola Ahmed Tinubu in a sawm angin a tlawh hmasa ber dawn a, hei hi kum 17 chhunga India Prime Minister in a tlawhna hmasa ber tur a ni ang. "Nigeria-a ka cham chhung hian kan thawh dunna leh ram pahnih inkar tih hmasawnna tur ka sawipui dawn a ni" a ti. Nigeria-a Indian chengte nen hun an hmang bawk ang.
Nigeria aṭangin Brazil khawpui Rio de Janeiro a pan dawn a, November 18 aṭanga ṭan tur G20 summit ah telin ni hnih a cham dawn a ni. India hi G20 member ram niin, PM hian khawvel huap thil pawimawh hrang hranga India dinhmun a sawi dawn a, hei hi G20 New Delhi Leaders' Declaration leh Voice of the Global South Summits rah chhuah a ni tih MEA chuan a sawi.
Summit kar lakah hian ram dang hruaitu eng emaw zat a kawm dawn bawk a ni.
Modi hian summit hman zawhah a zin hun chhunga a tlawh hnuhnung ber tur Guyana a tlawh leh dawn a, November 19-21 chhung a cham ang. Kum 1968 hnuah India prime minister zinga Guyana ram tlawh hmasa ber a ni ang. Guyana president Mohamed Irfaan Ali sawmnaa zin tur a ni a, President Ali pawh hi kum 2023 khan Indore-a Pravasi Bharatiya Divas hmannah khuallian rawn niin, ram danga India mi pawh chawimawina pek ṭhin zinga a sang ber, Pravasi Bharatiya Samman an lo hlan tawh bawk.
