Temple-a buaina chhuak thei ven nan 'Consular Camp' ti tawp

India leh Canada inkara buaina neuh neuh awm chho zel te thlir chungin leh, tun hnaia kut thawh zawnga nawrh huaihawtte an awm tak avangin Canada-a Brampton Triveni Mandir leh Community Centre chuan consular camp buatsaih an tum chu tih tawp rih a ni.

Consular camp hi November 17, 2024-a hman tura ruahman niin he hun hi India mi leh sa, Hindu leh Sikhs te hnena life certificate hlanna hun atana hman ṭhin a ni. He hun hi Indian High Commission nena thawk hoin an buatsaih ṭhin a ni.

Temple board of director chuan Brampton Triveni Mandir-a Life Certificate pek chhuah hi, November 17, 2023 a neih tura tih chu tih tawp rih a nih thu sawiin, hei hi official intelligence Peel Regional Police-in tharum leh pawikhawih zawnga chetna thlen a hlauthawnawm thu an sawi vang niin an tarlang.

Police hotu Nishan Duraiappah thurawn angin, Brampton Triveni Madir leh mipui tlawhtute himna ngaihtuah vangin life certificate hlan tura tih chu tih tawp rin anih thu leh he hun hman tuma inbuatsaih zawng zawng te hnenah ngaihdam an dil nghal thu an tarlang zui nghal bawk.

November 4 khan Khalistani thlawptute chuan Sikh mi leh sate beihna rapthlak tak thleng champha vawi 40-naah temple bulah hian pungkhawmin lungawi lohna an lantir tawh a, Brampton-a Hindu Sabha Temple-a kal Hindu eng emaw zat chu an bei a ni. He thil thleng hi prime minister Narendra Modi chuan na takin a dem thu a sawi a, ram hrang hrangah pawh Canada demna thu sawi a tam hle a ni.