Chennai damdawi in-ah doctor na takin vit hliam

Tamil Nadu khawpui, Chennai-a Kalaignar Centenary Super Speciality Hospital(KCSSH), Guindy-ah nimin, Nilaini zing khan doctor pakhat chu a enkawllai dam lo fapa chuan chemin a nghawngah na takin a vit hliam.

Police-te chuan pawikhawhtu hi an man nghal a, thu zawh fiah turin mi dang pali chu Guindy police station-ah an hruai bawk.

Doctor an vih hliam hi Dr Balaji Jagannath niin, vawi sarih vih a ni. ICU ah dah luh nghal a ni a, a dinhmun a ṭha lo hle nia tarlan a ni.

Pawikhawihtu hi Vignesh niin Perungalathur-a cheng a ni a, out patient te luh theihna pass neiin Department of Oncology-ah hian Dr Jagannath duty lai chu chemte nen a bei ta mai a ni. A pawikhawih hnu hian tlanchhiat a tum a, mahse midangten lo man hmanin police kutah an hlan ta a ni. Amah hi midang pali in an zui bawk ni a thudawn a ni. Vigesh hian a nu, Prema cancer natna enkawl mek chungchangah a enkawltu doctor chu a nu zual chhanah a puh a ni.

Tamil Nadu chief minister MK Stalin chuan he thil thleng hian a ṭhawng hle tih sawiin, pawikhawihtu chu man nghal a nih thu a tarlang bawk. Dr Balaji chu enkawlna tura thil ṭul leh ngaite chu rang taka ti vek turin a chah a, he thil thleng hi chhui chian a ni dawn tih a sawi bawk.

CM chuan rim taka thawk doctor-te hnathawh kara an hnathawhna hmuna an himna pek chu tih makmawh a nih thu sawiin, state sorkar chuan hma lam hunah hetiang thil a thlen nawn tawh lohna turin a tul angin hma a la nghal dawn tih a sawi a ni.