Tamil Nadu-ah ruahsur nasa vangin zirna in khar

Tamil Nadu huam chhunga ruahsur nasa avangin district ṭhenkhatah sikul leh college te chu nimin Nilaini khan khar a ni. Chawlh avanga exam nei lai khaihlakte pawh khawchin thlira an exam hun hi siam rem leh tur a ni tih an puang bawk.

India Meteorological Department (IMD) chuan Chennai leh district dang 11-ah Zirtawpni thleng ruah a la sur chhunzawm dawn tih sawiin yellow alert a ti chhuak. State deputy chief minister Udhayanidhi Stalin chuan ruahsur nasain nghawng a neih turte lo buaipui turin state sorkar chuan a inralring reng tih a sawi a, Chennai khawpui bikah pawh ruahmanna fel fai tak siam a ni, a ti. "Motor pump pawh tam zawk dahin, ruahsur nasatna hmunahte volunteer dah belh an ni bawk," tiin, ruahsur nasa viau mah se Chennai khawpui leh a chhehvel tuilian a thleng lo a, rel service pawh a bahhlah lo tih a sawi.