Jammu and Kashmir-a chief minister Omar Abdullah kaihhruai sorkar thar a din hnuah, assembly session hmasa ber chu nimin aṭang khan an nei ṭan.
Assembly inthlan hnuhnung berah Abdullah kaihhruai National Conference hi thlan tlin an ni. Assembly seat 90 awmah seat 42 lain, a thawhpui party dangte nen sorkar an siam a ni. Inthlan dawna an au hla berah J&K special status pekna, Article 370 ṭhiah tak hman leh a nih theihna tura an beih tur an aupui vangin assembly session pawh hian ngaihven a hlawh hle. Kum ruk hnua J&K assembly session neih leh hmasa ber hian ni nga a awh ang.
Session ni khatnaah hian Assembly speaker tur an thlang nghal a, NC senior leader Abdul Rahim Rather chu speaker atan lungrual takin voice vote hmangin an thlang. Rather hi kum 1977 MLA-ah a vawi khatna atan thlan tlin a ni a, kumin kha MLA term sarih a chelhna a ni.
J&K-a helpawl beihna thleng fo karah assembly session hi neih a ni. Tun ṭum session-ah hian August 5, 2019-a Article 370 tih bo tak hman leh chungchang bakah, J&K state puitlinga hlan kai chu ngaihtuah ho tura tih a ni.
BJP MLA-te chuan Pathianni khan Srinagar-ah Sunil Sharma chu legislature party leader atan an thlang a, Assembly-ah opposition leader nihna a chelh nghal ang.BJP hi party mala seat la hnem ber dawttu niin, MLA 29 a nei.
Session ni khat niah hian People Democratic Party legislature, Wahid Parra chuan Article 370 tihtawp duh lohna resolution chu a pharh a, council of ministers pawhin state puitlinga hlankai phutna resolution an pu lut bawk. Lieutenant Governor Manoj Sinha hian sorkar chuan state puitlinga dah an nih leh theihna turin theihtawp a chhuah dawn tih a sawi.
